૨૦૦ થી વધુ સ્કૂલે જાતિના દાખલાના કામના બહિષ્કાર કરતા વિદ્યાર્થીઓની હાલત કફોડી

સુરત શહેરની ૨૦૦ જેટલી ખાનગી સ્કુલોઍ વિદ્યાર્થીઓના જાતિના દાખલા આપવાની કામગીરીનો બહિષ્કાર કર્યો હોવાથી આજે ઍ પરિણામ આવ્યુ છે કે મોંધીદાટ ફી ચૂકવી હોવા છતા સ્કુલ સંચાલકોની આડોડાઇના કારણે જાતિના પ્રમાણપત્ર મેળવવા માટે વિદ્યાર્થીઓઍ કચેરીની બહાર કલાકો સુધી લાઇનમાં ઉભા રહેવુ પડી રહ્ના છે. જયારે ગ્રાન્ટેડ સ્કુલોના વિદ્યાર્થીઓને પરિણામ સાથે જ જાતિ પ્રમાણપત્ર મળી ગયા હતા.

દર વર્ષ પરિણામ આવે ઍટલે વિદ્યાર્થીઓઍ આવકના દાખલા, નોન ક્રિમિલીયર સર્ટિફિકેટ કે જાતિના દાખલા માટે દોડાદોડી કરવી પડતી હોય છે. જેમાં જાતિના દાખલામાં સામાજિક અને શૈક્ષણિક રીતે પછાત ( ઓબીસી ) વર્ગોના પ્રમાણપત્ર મેળવવા માટે વિદ્યાર્થીઓની સંખ્યા વધુ હોવાથી વિકસતી જાતિના નાયબ નિયામક દ્વારા વિદ્યાર્થીઓને કચેરી સુધી ધક્કા ખાવી નહીં પડે તે માટે આગોતરુ આયોજન કરાયુ છે. સ્કુલ સંચાલકો પાસેથી વિદ્યાર્થીઓના તમામ પુરાવા મંગાવી લઇ કચેરીમાં જાતિના પ્રમાણપત્ર તૈયાર કરીને સ્કુલમાં જ મોકલી આપવામાં આવે છે. વિદ્યાર્થીઓ જયારે ધોરણ-૧૦ નુ પરિણામ લેવા આવે ત્યારે ઍક સાથે ત્રણ પુરાવા માર્કશીટ, લીવીંગ સર્ટિફિકેટ અને જાતિનું પ્રમાણપત્ર મળી રહેતા વાલીઓ અને વિદ્યાર્થીઓનુ અડધુ ટેન્શન ઓછુ થઇ જતુ હોય છે. આ વર્ષે પણ નાયબ નિયામક કચેરી દ્વારા સ્કુલોમાંથી વિદ્યાર્થીઓના પુરાવા મંગાવાયા હતા. જેમાં સુરત શહેરની ૪૦૭ સ્કુલોમાંથી અડધી ૨૧૯ સ્કુલોઍ વિદ્યાર્થીઓના પુરાવા રજુ કરતા ૭૭૦૦ વિદ્યાર્થીઓને જાતિના દાખલા ઇસ્યુ કરી દેવાયા હતા. જયારે ૨૦૦ જેટલી સ્કુલોઍ વિદ્યાર્થીઓના પુરાવા રજુ નહીં કરતા આ સ્કુલના વિદ્યાર્થીઓ જાતિના પ્રમાણપત્ર માટે ધક્કા ખાઇ રહ્ના છે.