ડભોલીના ફાર્મ હાઉસમાં લગ્નમાં ગયેલા ઝવેરીના મોપેડમાંથી રૂ.૨૩.૧૫ લાખની મતાની બેગની ચોરી

ડભોલી ગામે ફાર્મ હાઉસમાં સંબંધીના લગ્નમાં ગયેલા ઝવેરીની મોપેડની ડિકીમાંથી દાગીના અને રોકડ સહિત ૨૩.૧૫ લાખની મતાની બેગની ચોરી થઈ છે. ડભોલી ગામે વર્ણી ફાર્મ હાઉસની બહાર પાર્કીંગમાં મોપેડ મુકી હતી. ચોરી અંગે ઝવેરી મનહર તેજાણીઍ સિંગણપોર પોલીસમાં ફરિયાદ આપી છે. જેના આધારે પોલીસે ગુનો નોંધી તપાસ શરૂ કરી છે.

સિંગણપોર હરિદર્શનનો ખાડો શુભલક્ષ્મી રો – હાઉસમાં રહેતા ૨૬ વર્ષીય મનહરભાઈ તેજાણી ૨૨ કેરેટના હીરાના ૨૫ પેકેટો રૂ.૧૦ લાખ , ૧ લાખની રોકડ , ડાયમંડ સિલ્વર ૬ અંગુઠી રૂ. ૭ લાખ , ૩૫ ગ્રામનું સોનાની લક્કી રૂ. ૧.૪૫ લાખ , ૩૦ ગ્રામ સોનાની લગડી રૂ. ૧.૩૦ લાખ , ૧.૮૦ લાખની કિંમતની સોનાની રૂદ્રાક્ષ માળા, ૫ ગ્રામ સોનાનું બિસ્કિટ ૨૫૦૦૦, ૩૫ હજારની કિંમતના ૩ મોબાઇલો અને બેંકના ડોક્યુમેન્ટો , ક્રેડિટ કાર્ડ , ઍટીઍમ કાર્ડ , આધારકાર્ડ , પાનકાર્ડ સહિત રૂ. ૨૩.૧૫ લાખની મતા બેગમાં મુકી ૪ ઓક્ટોબરે સાંજે સુમુલડેરી રોડ પર આવેલી દુકાનેથી ઘરે આવતા હતા. તેઓઍ મોપેડની ડિકીમાં કિંમતી સામાનની બેગ મુકી દીધી હતી. ઝવેરી ઘરે આવ્યો તો ઘરનું તાળું હતું અને પરિવારજનો ડભોલી ગામે વર્ણી ફાર્મ હાઉસમાં લગ્નમાં ગયા હતા. આથી મોપેડની ડિકીમાં જોખમ રાખીને ઝવેરી ફાર્મ હાઉસમાં લગ્નમાં ગયા હતા. આ અરસામાં ચોર ટોળકીઍ મોપેડની ડિકીમાંથી ૨૩.૧૫ લાખની મતાનું બેગ તફડાવી ભાગી ગયા હતા. હાલમાં સિંગણપોર પોલીસે સીસીટીવી કેમેરાના આધારે તપાસ શરૂ કરી છે.